S 201
[1] Hec SORS -tis, idest pars vel eventus vel fortuna vel responsum vel oraculum vel ars vel instrumentum divinandi, et dicitur sors responsum vel oraculum, quia in quibusdam locis dabantur responsa per sortes; unde hec sorticula diminutivum. [2] Et hic sorex -cis, quia semper sortiatur mortem et cedem, vel sorex dicitur a serra et rodo, quia rodat et in modum serre precidat, [3] unde hic soriculus et hic soricillus, ambo diminutiva, et hoc soricetum -ti, locus ubi sorices abundant. [4] Item a sors sortior -ris -titum, per sortes divinare vel tribuere et subministrare vel dividere vel adipisci; et componitur consortior -ris, resortior -ris, et est deponens cum suis compositis. [5] Sors componitur hic et hec consors -tis, idest socius eiusdem sortis, unde hoc consortium, et hic et hec exsors -tis, idest extra sortem; [6] et sortilegus -a -um, qui futura legit, idest colligit per sortes, unde hoc sortilegium talis divinatio, et sortividus -a -um, qui videt per sortes.
Colonna con sottomenu di navigazione
