L 37
[1] LAVO -as lavi lautum vel lotum; invenitur tamen quandoque lavavi, lavatum, secundum antiquos, quod est regularius. Lavare, idest mundare, purificare, abluere; et inde lavo -is -vi, idest humectare, madefacere. [2] Et a lavo, secundum antiquos, lavator, lavatrix et hoc lavatorium. [3] Item a lavo hoc lavacrum, idest ablutio baptismatis, et hoc lotium -tii, idest lixivium cum quo vestes abluuntur, vel urina, unde Macer De viribus herbarum 'cum mulsa bibitum locium producit'; [4] et hec lodix -cis, quicquid in lectulo supersternitur, et proprie pannus villosus: Iuvenalis 'zoe kai siche modo sub lodice relictis'; et hec lavandria -e, pro quadam herba. [5] Item a lavo vel lavor lautus -a -um, idest lavatus, et lotus -a -um, idest lautus, et componitur illotus -a -um, idest non lotus, immundus. [6] Item lautus accipitur active, secundum quod nomen est, et tunc tantum valet quantum 'se bene procurans', quasi munde, delitiose se procurans: Iuvenalis 'atticus eximie sic cenat lautus habetur, si rutilus demens'. Quidam dicunt quod lautus est sincopatum, pro lavatus: quod non credimus esse verum; et comparatur; [7] et inde hec lautia et hec lautitia -e, idest epularum magnificentia. Proprie lautie sive lautitie dicuntur deliciosi et delicati cibi vel munditie. [8] Item et inde lautiosus -a -um et lautitiosus -a -um, idest deliciosus; et comparatur. Et inde lautiositas -tis et hec lautitiositas, idest deliciositas. [9] Item a lavo hoc labrum, unde labellum diminutivum, idest alveus, quia in eo infantes solent lavari, sed de hoc iam sermo precessit. Lavo -as et lavo -is cum omnibus suis compositis, si qua habent, activa sunt et habent idem preteritum et idem supinum, et corripiunt hanc sillabam lain presenti, sed in preterito eam producunt.
Colonna con sottomenu di navigazione
