L 19
[1] LANIO -as, idest scindere, lacerare; et hic lanio -nis, qui laniat, qui etiam hic lanista dicitur et hic lanius -nii: laniones et laniste et lanii dicuntur carnifìces, idest homicide et macellatores a laniando, scilicet carnes, unde Terentius in Eunucho 'concurrunt leti obviam michi cupidinarii, cetarii, lanii'. [2] Item a lanio hoc laniatorium, idest macellum, ubi carnes laniantur, et hec laniena -e, idest domus medicorum, ubi laniantur infirmi, unde Prudentius in libro Ymnorum 'laniena quando sevit in ypocratica'; [3] et hec lana, quia laniatur dum carpitur, vel quia olim lane prius laniarentur, idest vellerentur, non tonderentur, unde et vellus dictum est a vellendo. [4] Unde lanosus -a -um et lanutus -a -um, lanam habens vel lana abundans; et laneus, de lana existens, et lanitus -a -um et lanicus -a -um, in eodem sensu; [5] et hic laniscus -sci, idest fasciola ex lana, et hic laniarius, idest retiarius, et hec lanugo -nis, idest lana super poma et prima barba, a similitudine lane, et hinc lanuginosus -a -um, plenus lanugine. [6] Lana componitur laniger -a -um, idest gerens lanam, ut ovis, et lanifico -as, idest lanam facete, unde hic et hec lanifex -cis, qui lanam facit vel ex lana operatur; et hinc hoc lanificium, idest lane operatio, et lanoculus -a -um similiter componitur, a lana et oculus, scilicet qui frequenter lanam adhibet ad infìrmos oculos tergendos. [7] Item a lanio hec lamia -e, quasi lania a laniando, scilicet pueros. Ferunt fabule lamias clausis ianuis domos intrare et infantes corripere et laniare, et postea vivos restituere, et habent faciem hominis sed corpus bestiarum. [8] Lanio componitur collanio -as; dilanio -as; relanio -as, et est activum cum omnibus suis compositis.
Colonna con sottomenu di navigazione
