H 5
[1] Hic HAMUS, idest ferrum recurvum cum quo capiuntur pisces. Et producit primam, ut ostendit ille versus 'unam semper amo cuius non solvar ab hamo'. Hamus etiam est macula lorice, et similiter producit primam, unde (Verg. Aen. 3, 467) 'loricam consertam hamis auroque trilicem'. [2] Dicitur etiam hamus asser cum clavis qui subtegitur terra in vineis sub arboribus defendendis, vel in domo circa scrinia et thesauros, ut, si aliquando fur ingrediatur, eius pedibus infigatur et ita fur deprehendatur; et tunc corripitur prima: Iuvenalis 'misera est custodia census dispositus predives hamis vigilare cohortem servorum noctu Licinus iubet'. [3] Et ab hamo piscium vel lorice hamatus -a -um, idest curvatus ad modum hami vel uncinis circumdatus vel squamis contextus, et hic amicus -ci ab hamo, idest catena amoris, caritatis; vel dicitur ab amo -as, ut supra dictum est, [4] et hec amis -tis, idest fustis aucupalis, scilicet virgula que sustinet rete quo capiuntur fere vel que levat rete cum quo capiuntur aves, unde Oratius in Odis 'aut amite levi parva tendit retia certusque edacibus dolos'.