Quod calvities veluti quodam praesagio futurorum quibusdam provenire videatur
Carmina, clarisonae, calvis cantate, Camenae.Cum crescit calvi capitis cervice corona,
Consortem cleri consignat confore calvum,
Capturum claram Cristo cedente coronam.
Ceu crines capitis convellens crimina cordis,
Corde creatorem conspectat, corpore caelum.
Caelicolas cives cupiens contingere cultu,
Crimina cum curis condempnat cuncta caducis;
Caeli conscensum, concentum caelicolarum
Concipiens cupide collaudat cuncta creantem.